Acara Partumpolon

ACARA IBADAH PARTUMPOLON

Jimmi Pangaloan Manurung

Dohot

Elina br. Silalahi

I. Pangaradeon :

        ( Ro ma Pangoli & Oroan & Hasuhuton  tu ruang Konsistoris)

II. Acara Ibadah :

01. Marende No. 15: 1 + 4       “Aut Nasaribu haliganda”     BL.103

1.     Aut nasaribu hali ganda, saringar ni soarangki. Naeng nasa

gogo bahenonku, mamuji Debatanta i. Paboa las ni rohangki,

hinorhon ni  pambaenNai. ~~~Jongjong~~~~

4.   Mauliate ma rohangku di Ho, o Debata tongtong. Dibaen sude denggan basaMu, naung nilehonMu di au on. Ai dipatongon Ho tongtong, sude na ringkot di ahu on.

02. Votum – Introitus – Tangiang:

(Hatorangan: L: Liturgis; A= Ama; I= Ina; S= Sude)

L    :  Marhitehite goar ni Debata Ama, AnakNa Tuhan Jesus Kristus dohot Tondi Parbadia, na manompa langit dohot tano on. Amen. Ale Jahowa sai Ho do haporusan nami marsundut-sundut. Sai mangaranapi do matangku dompak Ho, ale na marhabangsa di banua ginjang.

A   : Marhaposan tu Jahowa ma hita sian nasa rohanta jala unang marpangunsandean hita tu pingkiranta sandiri, sai Ibana ma tanda di nasa dalanta, asa Ibana  patigor angka dalanta. Ai pasupasu ni Jahowa do mambahen mamora jala ndang mardongan hangoluton dibahen.

L    : Martua ma baoa na marhaposan tu Jahowa, jala Jahowa haporusanna dibahen. Sai diajari Jahowa ma hita mangula-hon lomo ni rohaNa, ai Ibana do Debatanta, tondiNa na denggan i ma manogihon jala mangaramoti hita di tano na homop.

I     : Godang ma tongon nabinahen ni Jahowa tu hita, jadi marhiras ni roha ma hita disi. Sai jumolo ma talului Harajaon ni Debata dohot hatigoranNa dungi tambahonon-a ma sude angka ondeng tu hita.

L    :  Idama, pangarimpunan ni na denggan naung huida i: Lehet do mangan minum jolma i jala dipasonang rohana mangihutihut sandok ulaonna hian na niulana di hasiangan on saleleng di ngoluna, na nilehon ni Debata tu ibana; ai i do jambarna.

S    :  Angkup ni i, molo dilehon Debata tu manang ise jolma hamoraon dohot sinamot, diloas ibana mangan dohot mambuat jambarna sian i, huhut marlas ni roha diulaonna, silehon-lehon ni Debata do i.

L    :  Ai ndang sadia dipaingot-ingot rohana angka ari ni ngoluna, ala naung nialusan ni Debata ibana marhite sian las ni rohana.

  PANGOLI DOHOT OROAN: Ianggo ahu dohot donganku sajabu, ingkon Jahowa do oloan nami tujoloanon.

L    : Hasangapon ma di Debata Ama, AnakNa Tuhan Jesus Kristus, dohot Tondi Parbadia.

S    : Amen. ~~~~ hundul ma hita ~~~~

03. Koor. Betania 

     

04. Manjaha Surat Parpadanan:

L    :  Hamuna angka dongan sahaporseaon! Nuaeng tabege ma hujahahon hami isi ni surat parpadanan ni ianakhon ni Hurianta Jimmi Pangaloan Manurung dohot Elina br. Silalahi isi ni Parpadanan siundukhononnasida sadari on di adopanta. Tapaihut-ihut ma.

                       (Angka na manandatangani surat parpadanan)

1. Pangoli dohot oroan.

2. Natoras ni pangoli dohot oroan.

3. Saksi sian pihak paranak dohot parboru.

4. Mewakili Sintua lingkungan sian paranak dohot parboru.

5. Napatumpolhon.

L    : Hamu angka dongan sahaporseaon, lumobi ma hamu na dua: Jimmi Pangaloan Manurung dohot Elina br. Silalahi nunga marpadan hamu di adopan ni Tuhanta na pasadahon hamu na dua marhite Parhalado ni HuriaNa, diadopan ni natorasmuna nang dongan sahapor-seaonmuna pe naeng pajongjonghon pardongan saripeon-muna. Mansai arga do parpadanan on; ndang holan di hita jolma i arga, alai dohot do di jolo ni Debata. “Hori do ihot ni doton hata do siingoton; Togu urat ni bulu toguan urat ni padang; Togu niihot ni uhum toguan do niihot ni padan”.

NATORAS DOHOT UNDANGAN:   

         Dibahen i, ramoti jala ulahon hamu ma padan naung niundukhonmuna; tung unang adong sian hamu silaosi padan, asa dipasupasu Tuhanta parsaripeonmuna di ariari ni ngolumuna.

PANGOLI DOHOT OROAN:

         Sai dipargogoi Tuhan Debata ma hami maniop padan naung hupadanhon hami sadari on, sai unang ma tutu adong sian hami na manimbil jala siose padan, asa mardalan parsari-peonnami sahat ro di ujungna dibagasan hadameon.

L    : I ma tutu ale Tuhan, patulus ma pardongansaripeon nasida tu joloan on.

05. Marende BE. 125.3            “Marlas ni roha”                          BL.82

3.         O Jesus tatap hami on, sai pargogoi sude

         Marhitehite TondiMi pasauthon angka patikMi

         Mambahen rarat baritaMi, di nasa jolma pe, di nasa jolma pe

06. Jamita :

07. Koor : PT.Atas

08. Marende No. 691: 1- ”Hupasahat ma tu Jesus”                                BL. 691

                                (Laos pasahathon pelean tu Huria)

1.       Hupasahat ma tu Jesus saluhutna ngolungki,

Roha nang pambahenanku, saluhutna tingkingki.

Reff. Hupasahat ma tu Jesus, saluhutna diringki.

        Hupasahat ma tu Jesus saluhutna ngolungki.

2.       Pangkeonku ma tanganku, mangula lomoNa i,

Langka nang simanjojakhu mangihuthon Tuhanki.  

Reff. Hupasahat ma tu Jesus.....!

3.       Mauliate ma rohangku, ala au hinophopMi.

Pujionku ma goarMu, salelenglelengna i.

Reff. Hupasahat ma tu Jesus....!

09.Tangiang Pelean & Pasupasu & Amen ( 3x diendehon).

III. Hata Huhuasi

1. Sian Parboru
2. Sian Paranak

Acara panangkhon Sari2

PARTANGIANGAN

PANANGKOKHON SARINGSARING TU TAMBAK NA PIR

Kel Besar Bisker Rumapea ( Op. Dita)

Soripadana R.br. Silalahi

Sabtu, 29 Juni 2013

==================================================

 (Hatorangan : P=Parangenda ; R=Ruas)

1. Marende 361:1-2                Na denggan situtu

Na denggan situtu do mamuji Debata

Jahowa na tumimbo Na sai tongtong basa

Denggan do paboahon Manogot asiMi

Bodari mangendehon BurjuM nang sintongMi

                        Mardongan sipiltihon Na denggan situtu

                        Naeng ma tongtong pujion Ni nasa na burju

                        Ho Tuhan Debatangku Ai las ni rohangki

                        Do na tongtong binaenMu Di pambahenanMi.

2. Votum-Introitus

P    :       Marhitehite Goar ni Debata Ama, dohot Goar ni AnakNa, Tuhan Jesus Kristus dohot Goar ni Tondi Parbadia na manompa langit dohot tano on, dipasaor ma dameNa tu tondinta. Amen.

R     :      Ale Jesus Tuhannami, bereng hami na dison. PinarmahanMi do hami saluhutna na dison, sai asi rohaM di hami, sai pangolu hami on.

P   :        Unang ho mabiar, Ai ahu do Parjolo jala parpudi ! Au do siparngolu; naung mate do au na jolo, gabe mangolu antong rodi salelenglelengna; Di Ahu do anak hinsu ni hamatean dohot banua toru.

R    :       Tangihon ma hami ale Jahowa sian asi ni roham.

P    :       Ale Jahowa Tuhan nami na di banua ginjang pujipujianma hu pasahat hami mardongan mauliate tu Ho, ala tontong dilehon Ho hatam na gabe sitangihonon jala siihuthonon nami asa mangolu hami songon naung pinatikhonmu.

R   :        Ale Jahowa Ama nami, pungu do dison keluarga pomparan ni amanami Kel. Besar Bisker Rumapea & Soripadana R. br. Silalahi (Op. Dita) dohot angka dongan na marholong roha di hami nang dongan huta di bagasan sada ni roha laho pasangaphon Ho ale Jahowa marhite ulaon sadarion.

P    :       Jahowa, Debata nami marpungu do hami sadarion na manghalashon dihatutulus ni ulaon  panangkokhon saringsaring na hinaholonganna naung jumolo i.

R    :       Marsomba hami tu adopanMu na badia i ale Jahowa, asa ajari, pangkulingi hami, urupi hami asa unang gabe songon sipelebegu hami alai ingkon do gabe patimbulhon jala pasangaphon GoarMu na badia i asa marsangap jala marmulia Ho di tongatonga ni ulaon on.

P     :     Asi ma rohaM, sai pargogoi ma hami marhitehite TondiM, asa margogo hami mangoloi Ho di bagasan haporseaon na mangolu. Marhite Anakmu Jesus Kristus Tuhan Sioloan nami. Amen

4.  KOOR: INA KAMIS

5.  Marende BE. 15: 1+3                    Aut na saribu hali ganda

              Aut na saribu hali ganda saringar ni soarangki

              Naeng nasa gogo bahenonku mamuji Debatantai

              Paboa las ni rohangki hinorhon ni pambaenna i.

                        Hupuji dohot Ho o Jesus Marningot asi ni rohaM

Marningot mudarMi na durus Ro di sude dengganbasaM

                        Patupa haluaon i Di au pardosa godang i.

6. Manjaha Ayat

P    :       Ale Jahowa, Debata Amanami. Ho do pargogo na so hatudosan na manompa langit, tano dohot nasa isina. Na badia do Ho jala parasiroha na manontong ro di salelenglelengna.

R      :     Nang pe merus sibukku dohot rohangku, sai Debata do partanobatoan ni rohangku jala parjambaranku salelenglelengna. (Psalmen 73:26)

P     :      Jahowa, Debata Amanami. Jotjot do husungguli hami rimasMu, jala ndang hu ula hami lomo ni RahaM, atikpe naung dilehon jala dihatahon Ho Barita na Uli tu hami

R      :     Sai ajarhon ma tu ahu, ale Jahowa, dalanMu, asa marpangalaho ahu di bagsan hasintonganMi, sai pasada ma rohangku mangkabiari goarMu. (Psalmen 86:11)

P     :      Jahowa, Debata Amanami. Unang loas hami ganggu jala gale haporseaon nami marhitehite ulaon na so hinalomohonMu; i ma pos ni roha di angka ulpuhan ni hadatuon, manungkun jala manghaposi sumangot manang sahala ni ompu, martondung dohot maniti ari.

R     :      Sai unang paingotingot angka dosangku dohot pangalaosingku, sai ingot ma ahu, ale Jahowa, hombar tu asi ni rohaM, ala ni denggan ni basaM.

P     :     Molo tung adong na mardosa, adong do pangondiananta tu Ama i, ima Jesus Kristus, Partigor i. Ibana do pardengganan pasaehon angka dosata; alai ndada holan dosanta, tung dohot do dosa ni sandok portibio on. (1 Joh. 2:1^b-2). Hasangapon ma di Debata na di ginjang. Amen

7. KOOR: PT. ATAS

8. Marende 30:3-4                  Jesus lehon hatorangan

            Sai martua ma nasida Na mambahen Jesus haposanNa i

Aut tung sura olo hita Jesus i baen parsigantunganta i

Ale Jesus sai patogu Hami na di parporangan

Asa dapot di ujungna hamonangan

                        Sai tangihon ale Tuhan Molo martangiang hami be tu Ho

                        Pasupasu marlobian LehononMu tu na ro manopot Ho

                        Sai dongani nama hami Asa hot di parpadanan

                        Mian hami sahat ro tu hasonangan.

9.  Jamita/ Renungan :

10. Koor: BETANIA

11. Hata Sipaingot

Uluan       :    Hamu angka dongan sahaporseaon nunga dipanangkok hamu saringsaring ni angka hinaholongan ni rohamuna naung diongkal hamu na diari na salpu

Hasuhuton : Debata ma na patulushon ulaon on, ai huulahonhami on   ndada namarpangkirimon hami songon ulaon ni angka halak sipelebegu alai paboa na diramoti, diparmudumudu jala dipasada Debata do hami saluhutna angka pinompar ni ompu nami on.

Uluan      :    Didok Debata, Anggo halak naung mate, ndang diboto agia aha, ai nunga lupa nasida di parningotan nang holong ni rohana, hosom dohot iburu ni roha pe nunga mago sian nasida jala ndang be marjambar nasida di saluhut angka na masa di hasiangan on, nang tu hita ndang adong be pardomuan nasida.

Hula-hula :    Alani I ndang tama be hita manghatai dohot manghirim tua nang pasupasu sian angka na mate manang sumangotna pe. Haroronami, asa sada do hita mangido angka pinompar ni namborunami naung parjolo mandapothon Tuhanna. Parhiteanta namanghamauliatehon denggan basa ni Debata do ulaon on jala paboa na hot do padan ni Debata tu hamu sahat rodi saleleng ni lelengna.

Uluan      :     Ingkon badia do roha dohot pangalahonta mangulahon ulaon on, unang masa manortori holi, manulangi dohot mangalehon napuran, mangandungi songon na so marpanghirimon.

12.  Marende BE.211: 1-2      Tuhan Jesus Siparmahan (P.Pelean)    

              Tuhan Jesus Siparmahan Au birubiruNa do

              Jesus gok di Ho rohangku Sai ihuthononku Ho

              Sai ihuthononku Ho, Sai ihuthononku Ho

              Jesus gok di Ho rohangku Sai ihuthononku Ho

                         Jumpa masa sorimago Tung pangapul Ho gogo

                        Ia bogasMi huida Sai ihuthononku Ho          

                        Sai ihuthononku Ho, Sai ihuthononku Ho

                        Ia bogasMi huida Sai ihuthononku Ho

13.      Tangiang Pelean - Ale Amanami - Pasupasu

BARITAHON MA BARITA NA ULI I

ULAON 1.6-14

            Sasintongna Manghatai  taringot tu haheheon ni Tuhan Jesus, boi dohonon sarupa do I tu na manghatai tu sada situasi na so hapingkiran ni jolma. Boasa didok songon i ? ala ndang boi antusan holan marhite pingkiran sambing. Hananaek ni Jesus tu lambung ni Ama I, ima patuduhon naung marujung do sada partingkian na marpardomuan tu pangulaon ni Jesus di portibi on, jala marpaima ma muse jolma I tu sada partingkian na imbaru. Molo na saleleng on, angka na porsea rap dohot sisean I, mananda jala manghaporseai Jesus na mian di sadasada inganan; alai dung manaek tu banua ginjang tu lambung ni Ama I, gabe tubu ma pangantusion na imbaru, ia Jesus nunga gabe Tuhan ni saluhut jala naung maringanan di sude inganan (omni presentia). Gabe salpu ma sada partingkian, jala na ro ma sada partingkian na imbaru muse. Alani angka dia ma barita nauli di hananaek ni Tuhan Jesus i ?

1.    Marhite hananaek ni Tuhan Jesus tu banuaginjang, gabe singkop ma las ni roha ni angka na porsea i ; rap dohot Jesus di portibi on laos rap muse di banuaginjang sogot. Hombar ma tu hata ni endenta i na mandok : Sonang dilambung Jesus, rap hita lao tusi, inganan na ummuli do di lambungNa i… (BE.214.2). asa ndada holan angka sisean i hape na marlas ni roha, alai gabe marlas ni roha ma saluhut angka na porsea i ala naung manaek Jesus i.

2.    Manogihon hita do tu panogunoguon ni Tuhanta Jesus Kristus di tanggungjawab hakristenon marhite na lam tangkas botoonta ia haheheon dohot hananaek ni Jesus i, ima patuduhon hamonanganNa maralohon sumbia ni hamatean i. Hamonangan ni Jesus hamonangan ni angka na porsea. Jala holan dibagasan panjaloonta di Tondi Parbadia do boi tangkas botoonta jala tandaonta hamonangan ni Jesus i gabe hamonanganta

3.    Alani ni Tondi hananaekna i, tung lam margogo ma hita gabe pangorui di angka siparungkilhononhon, jala panambai di ragam ni las ni roha. Marlapatan ma disi angka halak Kristen naung manjalo Tondi Parbadia i gabe siboan hatigoran dohot hasintongan. Na gabe sungkunsungkun di hita nuaeng, olo do hita manang ndang gabe sitindangi ni Kristus di ngolunta on ? taalusi ma dibagasan rohanta be marhite pardalan ni ngolunta. Amen

4.    Thema : Baritahon ma Barita Na uli i 

a.       Tanda ni haporseonta be

b.      Ai sude do tarjou tu ulaon i

c.       Asa lam torop halak manghaporseai Jesus i

Ibana do na pahothon ( 1 Petr 5.10)

Adong ma sahalak parende na marusaho situtu asa boi gabe juara; mansai tabo do nian soarana, alai hurang penghayatan. Dinasahali tompu do mate hinaholongan ni rohana. Marsak situtu do ibana ala ni i, pola naeng mandele, ndang olo be ibana marende. Alai ala ni sosososo ni angka alealena, diihut ibana do sada festival. Hasilna tung halongangan do; ibana do juara. Boasa boi songon i? Huroha tung diingot ibana do hinaholonganna nanung monding i, gabe tangkas ma penghayatanna di endena i. I ma mambahen ibana ibana gabe juara.

Songon ima Debata mamangke angka haporsuhonta i laho paulihon hita. Paulihon, marlapatan do i: Mambahen na so adong hian di hita gabe adong. Jala dipangke Debata do haporsuhon i nang laho pahothon hita, asa unang mungilungil alai manahan sahat ro di ujungna. Laos patoguhon do muse haporsuhon i, mambahen hita lam somal jala tang huhut togu; songon hau di topi laut ba sai diombus alogo na gogo, lam togu hauna jala lam bagas do uratna, songon i do haporsuhon i pagomoshon jala patoguhon haporseonta. Mardonganhon Jesus sai na taluhononta do haporsuhon i ai nunga jumolo Ibana mananluhonsa.

Ngolu Na Dibagasan Tangiang

EV. Minggu Rogate 

05 Mei 2013

ROM 12.9-12

1.        Mardomu tu isi ni surat Rom on, disagi angka pande bisuk do surat Rom on tu dua bagian, ima : Hatorangan na bersifat dogmatis” na patoranghon taringot tu ruhutruhut haporseaon ni halak Kristen (bnd 1-11) dohot “ poda na bersifat praktis”. Sian bagian na paduahon on, songon na ni dok ni Apostel Jakobus asa unang holan na bersifat teori haporseaon I, alai naeng ma patar parulaon ni halak Kristen hombar tu haporseaon na sintong I (Jak 2.14-20). Tu horong on do ondolan ni turpuk Evangelium on asa naeng manogunogu halak Kristen na sintong manghangoluhon holong ni roha hataridaan ni hakristenon na tutu situtu, hombar tu suhatsuhat naung tinotophon no Tuhan Jesus ( Joh 13.34-35).

2.       Sipaingot (poda) marparsaoran tu dongan jolma/sahaporseaon mansai tangkas diondolhon poda taringot tu pambahenan holong ni roha tu dongan sahaporseaon. Ringkot parrohahononta pandohan na pinangke ni Apostel Paulus: Unang ma marpangansi holong ni roha i (holong Agape). Lapatanna na mamelehon diriNa-Memberi diriNya » manghobasi halak na asing. Asa naeng ganup halak Kristen mamelehon dirina manghobasi (Melayani) halak na asing. On do holong na sasintongna (holong Agape). Ndang na marpangansi holong ni roha I (kasih tidak bersandiwara), alai holong na tutu situtu bulus (ay 9-11). Marhite ondolan sisongon on, ganup halak naeng marsipatujoloanan mangulahon na denggan maradophon donganna. Pandohan: Unang ma sumurut ringgas ni rohga muna….ay 13) naeng patujolohon semangat manghobasi na denggan maradophon donganna lumobi maradophon Debata (Mat 25.31-46). Jadi marhite pandohan on: “Marhobas mangurupi donganna, sejatina marhobas manghobasi Debata”. Jadi, holan hasurungan hagogoon dohot hasurungan haporseaon ni halak Kristen do mampu mangulahon holong ni roha na polin jala naung manjalo Tondi ni Debata mangula dibagasan dirina (Joh 4.24).

3.       Unang paloas masuk angka pingkiran na roa tu dirim taringot tu dongan na hinaholongan, jala unang pasiat tu roham angka tuhastuhas na so tangkas dompak angka dongan na hinanholongan asa unang runsur jala peut holong ni roha tu nasida. Dibahen I, ingkon pilliton do na denggan, unang na jahat, asa magodang holong ni roha di bagasan hita. Ingkon manat do hita tu angka parjahat na late rohan mida angka na masihaholongan, na girgir mamolamola, asa mansihosoman angka na maraleale na mansihaholongan I di rohana. Holong na parjolo sahali ingkon patar I ma di huria ni halak Kristen, ala ganup halak Kristen i nunga manjalo silehonlehon marguru tu ragam ni asi ni roha na tinurpukhon ni Debata marhitehite Tondi Parbadia ( Rom 12.6; I Kort 12.11). Asa  hapataran ni pamatang ni Kristus, naeng tangkas huria I marsitumpahan di bagasan holong. Disi do hataridaan ni huria par-Tondi na girgir na so olo mandele, atik pe tarsosak dibahen portibi on. Di hamaolon ni portibi on, naeng huria manghirim di parbue na tonggi atik pe sai manggogo halinsungsung manghutur bunga dohot mutik ni hau na denggan di huria i.  Ingkon tubu ma diganup ngolu ni huria i semangat solidaritas sosial, ingkon tangkas do halak Kristen mangaradoti hasadaon, mamodahon hasintongan na sian hata ni Debata jala tongtong mamasumasu. On do na naeng gomos di panindangionta parbue ni huria naung halak na porsea tu Tuhan i.

4.       Didok pande bisuk « Doa adalah Jembata membuka Berkat-berkat Tuhan » Minggu Rogate(Martangia) ima sada tanda ni halak Kristen naung mandai holong dohot pambahenan ni Debata dingoluna. Parbue ni tangiang do na taida diturpuk on diajari do hita mangido na hasea tu ngolu siganup ari ala Ibana do tuk mangurupi hita patupa angka na denggan di ngolunta. Tangiang do pardomuan laho pasangaphon Debata dohot pahothon haporseaonta. Alani i ingkon rajumanta ma ngolu halak Kristen ima ngolu sipartangiang. Amen