Manghangoluhon Ngolu Sipartangian

Johanes 17.1-11

Godang do informasi na boi sibuatonta sian tangiang ni Tuhan Jesus na pinabotohonNa tu Ama i, angka naung diulahon misiNa di tongatonga ni portibion, tu angka siseanNa secara khusus. Jala diboto Jesus do dia resiko ns boi masa tu angka na mangihuthon Ibana( siseanNa ). Dung dilehon Jesus angka hata ni Debata tu angka sisean i marhite panghobasionNa; marjamita, mangajari dohot pamalum angka na marsahit gabe dihosomi do angka SiseanN i. Jala sarupa do resiko na niadopan ni Jesus dohot angka sisean i, ala sarupa status, hajongjongan ni angka na porsea dohot Jesus ndang sian portibion. Na marlapatan ndang songon hagiot ni portibion angka siihuthon Jesus. Si ulaon ni Debata do na niihuthon nasida jala patubuhon i gabe tutu roha na porsea sian natumangihon hata ni Debata(Rom 10.17). Debata do na mamillit nasida sian tongatonga ni portibion, ndang sian pikiran, roharoha nasida, manang ala hatauon nasida gabe dipillit jala ndang alani angka latarbelakang keluarga, status sosial-ekonomi tarjou nasida gabe sisean (Joh 15.19-20). Isi ni tangiang ni Jesus na khusus jala khusuk mandok: ndang apala hupangido taitonmu nasida sian portibion(unang jolo dijou Tuhan i/marujung ngolu), alai naeng ma ramotanmu(melindungi) nasida maralohon jahat, halak na manghosomi. Pangidoan ni Jesus ni Jesus i ma kemampuan, daya tahan laho mangadopi angka musu, angka na jahat, ai ndang tarbahen so adong resiko manang ancaman, tantangan dohot maut. Turpuk on ma tangiang parpudi tu angka siseanNa, jala patuduhon na dihaholongi do saluhut angka na porsea sian na jolo sahat tu sadarion. Jala tanging  on ma tangiang pangondianon(syafaat) dohot tangiang pasahathon saluhutna tu Ama i(namarsuru Ibana), ala nunga jumpang tingkina sidung ma pangulaon ni Jesus patulushon ni Debata ma sangkapNa, jala pasahaton ni Jesus ma pertanggung-jawaban pangulaonNa saleleng di portibi on. Hita do dipangke Debata laho patulushon sangkapNa di tongatonga ni portibion. Ala nunga dipasahat Tuhan Jesus hita angka siseanNa dohot angka na porsea tu Debata, ima na paposhon rohanta di sude angka pardalanan ni ngolunta. Asa monang hita mangadopi angka na masa di portibion, mamolus angka ragam ni parungkilon, hasusaan, hamaolon saleleng mangolu hita. Tu Debata ma tapasahat pangaramotion ni ngolunta dohot donganta ai nampuna ni Debata do hita saluhutna. Asa saluhut hita monang jala sahat tu Ama i ingkon manontong do hita martangiang( pts Kol 4.2). Nang so rap hita di sada inganan, asing be luatta, hutanta, asing be suku dohot agamanta, alai ingkon tangianghonon do hasadaon nang berbeda-beda hita be. Mangurupi donganta na susa di ekonomi marhitehite mangalehon dalan, mambuka pikiran ndang na bersifat karikatif alai bersifat mendidik/edukatif, haimbaruon/reformatif dohot perubahan na mendasar/transformatif. Tabahen ma hurianta huria na adong roha naungkap, tangan na burju mangurupi dohot pat na ringgas mangalehon dalan tu angka ruas siurupan ala ni tekanan sosial ekonomi struktur masyarakat, dna. Ido tanda ni parbue ngolu sipartangiang di adopan ni Tuhan i,  jala na olo mangondihon angka dongan saluhut jolma! Tahangoluhon ma hasadan i dibagasan ngolu na mansihaholongan. Amen