Jamita
Partangiangan sektor/weyk:
Efesus
1.3-14
Adong
do sada barita masa di sada laut, di laonlaon ni ari masa do sahit na jorbut di
sada luat jala nunga torop halak na marsahit, jala adong naung mate hinorhon ni
sahit i. Gabe mabiar do pangisi ni luat i, gabe tubu ma sungkunsungkun aha do
na mangisombut umbahen na masa sahit i. So ma ma i ate, molo masa sisongon on
sai tinggil do sipareon tu angka hatahata, nang pe so apala tapangke nalar
manang roha na tiur. Didok sada natuatua ma hatiha mamolus huta i martona:
" molo naeng malua jala malum sian parsahiton i naeng ma ganup jabu
manutung lomang dua bulu, jala molo dung masak lomang i ditanom ma sabulu di
tolo ni jabu manang alaman, alai sabulu nari dipangan pangisi ni bagas i ma.
Dungi i hira tolu ari sian i malum ma sude angka na marsahit jala ndang masa be
sahit na jorbut i. I ma barita na mehet i. Torop do pangisi ni i mangulahonsa,
domu ala ni biar ni roha di sahit i. Suang songon i ala luat na tardok ndang
apala maju dope. Hape tardok hira halak Kristen do sude pangisi ni luat i. Alai
dung dapot tolu ari songon tona ni naung niula nasida i, ida ma, ndang jumpang
hamalumon ni angka na marsahit. Gariada tahe lam torop na mangae ai holan
marbagahon tona i nama pangisi ni luat i, ndang adong be rohana laho marubat tu
puskesmas manang tu rumah sakit. Ai tona sipaotooto do hape, marisuang ma
lomang na tinonamna i.
Mansai
bagas do holong ni roh ani Debata na ginombarhon Ap. Paulus di surat Efesus on,
ai na so partohap hian ala ni dosa, gabe partohap di Harajaon ni Debata ala ni
Kristus na hehe sian na mate. I ma pasupasu partondion na jinalo ni angka na
porsea sian Debata, ndada porsea tu angka soara ni portibion songon masa di
barita. Dihirim roha ni Ap. Paulus do asa sude halak Kristen marlas ni roha
mangihuthon hata dohot tona ni Jesus i. Ingkon ingothonta do so ojak dope tano
on, nunga dipillit hian hita jala ditodo gabe anakNa marhitehite Jesus Kristus.
Na marlapatan tu dipasingkop do angka na ringkot di ngolunta, didaoni sahitnta
jala diapuli do angka na marsak ido jamina sian Tuhan i. Sian mulana do
dihalomohon Debata naeng malua hita sian nasa parmaraan ni daging dohot tondi.
Hombar
tusi ma ringkot auhononta panghophopon ni Jesus Kristus, naung buas mangusehon
mudarNa na badia i asa tung ias sian nasa dosanta. Marhite mudar ni Jesus i do
saut tajalo haluaon i. Didok Topik minggunta, 12 Juli 2015, hombar tu almanak
ni hurianta “Tumangihon jala mangoloi panurirangon ni Jahowa” na martudutudu
do i di hita asa suan di rohanta balga do holong ni Debata naung manodo hita
gabe anak panean di hangoluan sogot, marhitehite panghophopon ni Tuhan Jesus,
naung sinahaponNa dibagasan Tondi Parbadia. Holan angka na sai tumangihon jala
mangoloi angka hata ni Debata do na tuk mangantusi jala marhatopothon i di
ngoluna. Ai satia do Ibana manarihon dohot marmudumudu ngolu ni saluhut na
manghaporseai Ibana. Haporseai ma Tuhanta i asa unang tarurak hita dibagasan
ngolunta on. Didok di buku Judas 1.20” alai hamu angka haholongan, pauliuli
hamu ma dirimuna di atas haporseaonmuna na badia situtu, jala martangiang di
bagasan Tondi Parbadia. Amen
