Selasa, 14 Juli 2015

Gabe Asi Ma rohaNa Mida Nasida


Jamita Partangiangan:
Jeremia 23.1-6
Di zaman Millenium on nunga mengarah tu halumlamon pangalaho ni jolma. Ndang adong be tanggungjawab na songon uluan di ganup ulaonna be songon parmahan, hurang kepedulian maradophon donganna, di kelompok, keluarga, masyarakat dohot negara pe. Tidak ambil pusing maradophon aturan ni panggomgomi. Didok di Rom 13.1”naeng unduk tu panggomgomi na marsahala”. Laos songon i do nang sabalikna, ingkon dituntut haparmahanion sian sahalak panogunogu tu na tinoguna. Hape di turpuk on, didok do “Marje ma parmahana na mangago dohot paserakhon (ay 1-2), dilehon Debata do tanggungjawab tu sude na tinompa laho manjaga, manhandang laho parorothon jolma i (Hes 34.16).
Dipangido dison, uluan(pemimpin) na satia tu Debata, na mangolu dibagasan asi ni roha mangida angka na tardempar dohot na mauas diangka pasupasu ni Tuhan i. Manogu pasipasi ni bangsoi, ido na gabe sada dasor ulaon ni Debata di ngolu ni bangso (ay 3) asa matorop mabue bangso di angka pangalaho na denggan dohot nauli, lehononNa ubat tu angka na mabugang/na marsahit, mangalului angka na tardempar/na mago dohot na asing. Klimaks ni ulaon on i ma kesetiaan na mamolin maradophon na pinarmahanna, sesuai tu ganup kebutuhan. Sian i taida dihirim Debata do sian bangso i asa marparbue na tonggi na mambahen las roha ni Debata (1 Pet 1.9). Nuaeng ma berengonta paboa tingki (kairos) di halak Kristen, saluhutna i tingki laho mangula ulaon na denggan.
Adong pandohan: “sapaetpaet ni ngolu, tong do marpanghirimon”. Didok halak hita; “Agia pe lapalapa asal ma di toru ni sobuan, agia pe malapalap asal ma di hangoluan”, lapatanna sai adong dope panghirimon, lumobi di halak Kristen, naeng marpanghirimon di setaonon sogot, jala tusi do hita tarjaou, ido na sinoarahon ni Panurirang Jeremia diayat 5-6” patindangonHu ma di si David sada tumbur na tigor.....jala dapotan tua ma Juda, jala Israel marsonangsonang! Ai hira so ada do sitaonon na di hasiangan on martimbanghon hasangapon sipapataron sogot “eskatologis” (Efs 1.18). Sai dipatiur ma mata ni rohanta manatap doa sihirimon sogot i. Uhum dohot hasintonganNa i do na gabe sondang tu bagasan roha laho mamolati dia do na denggan dohot na roa.
Godang do naueng jolma, goarna panogunogu, hape sitogutoguon. Ndang adong tanggungjawab dohot kesadaraan be di jolma i sesuai tu ulaonna be. Holan pasombuhon tagasna, paburnang dirina be. Toho ma songon na didok ni hata umpama i: urat ni angka ehe, tu urat ni angka ihi. Hatana mangkaehe, rohana  manghilhili. Hatana songon na mangurupi, rohana manghilhili. Hape jamita na mangolu i ma jamita pangalaho do na dumenggan maradophon masyarakat nuaeng on. Alani lam marsitutu angka partogi, parmahan padimundimun na ringkot di masyarakat, di na pinarmahanna. Asa tiruan angka partogi, uluan di masyarakat di na pinarmahanna. Asa naeng ma tingki on pangkeonta laho patuduhon asi ni roha tu angka halak na mampar, dao sian Tuhan Jesus asa ro mandapothon Tuhan manopot hahuranganna jala manjalo ngolu na niuluhon ni Tuhan. Ai Jesus do parmahan na burju roha!! Amen