Jamita partangiangan sektor:
2
Musa 16.2-4+9-15
Sada sian saluhut naringkot di
ngolu ni jolma ima sipanganon, ala sipanganon i na manghorhon do i di pamatang
gabe mangolu jala margogo mangula siulaonna. Alani sai marusaho do ganup jolma
mangalului sipanganon sahat tu na papunguhon sinamotna. Molo moru pamatang na
manghorhon do i gabe hurang gizi jala mura madabu tu parsahiton, alani intap ni
na boi sai diparsinta jolma do anggiat singkop sipanganon na laho panganonna
ganup ari, ala ringkot ni sipanganon i tung so dihalomohon do masa haraparon di
ngolu ni jolma.
Ido barita masa di turpuk jamita
partangianganta minggu on, di na marmungutmungut bangso i dompak si Musa dohot
si Aron di halongonan i(ay 2). Sikap protes nasida dipambahenan ni Si Musa
dohot si Aron, ndang tarjalo roha nasida ala so dapot nasida kebutuhan ima
sipanganon di halongonan i, ido na didok na torop; ai ditogihon hamu hami
haruar tu halongonan on laho mamunu sandok luhutan on anturaparon"(ay 3).
Disituasi ni si Musa dohot si Aron ujui, dipanghuling Debata do si Musa; Ida ma
paroonHu ma tu hamu udan sagusagu(ay 5). Dung dihatahaon Debata tu si Musa
sisongon i dipabotohon ma tu si Aron dohot tu bangso i, paboa botoon nasida ma
Jahowa do na paruarhon sian tano Misir(ay 6) jala idoan na hasangapon ni Debata
ala nunga dibege Jahowa parungutunguton ni bangso dompak si Musa dohot si Aron.
Maralus do Debata diungutungut ni bangso, pola didok si Musa asa dipajonok
bangso i tu jolo ni Jahowa jala diida nasida ma hasangapon ni Jahowa dibagasan
ombun i(ay 9-10). Bodarion panganonmuna juhut jala manogot na i butongan hamu
mangan sagusagu.....asa tung diboto hamu, Ahu do Jahowa Debatamuna i(ay 12-13).
Pambahenan ni Debata i gabe sada alus na mansai arga di parsoaran ni bangso i,
sai na sarihonon jala togutogu ni Debata do nasida ganup ari asal ma tongtong
nasida manghaposi Tuhan i ganup ari (pat. Psalm 25.5).
Alani taida ma jolo barita jamita
naeng mamanghulingi partingkian; Padao ma ngolu na marugutungut sian ngolunta
on, didok sahalak na bisuk do: Tumagon do ndang mangan-minum dibagasan tolu ari
sian na so marpanghirimon tolu minit". Boha do tutu hinasintong ni
pandohan i? Asa dohonon ma mansai balga do panghorhon ni panghirimon i di
tongatonga ni hajolmaon. Ai ndang pintor mandele huhut marungutungut molo ro
angka parungkilon dingolu on. Di pardalanan ni ngolunta jotjot do hita
tinggang, tartuktuk, lilu jala matuktuk hian di ngolu on ala ni angka na masa.
Alai unang ma hita marungutungut, taingot ma disarihon do hita dipardalan ni
ngolunta on. Ai ndang na hurang ganjang tangan ni Jahowa laho mangurupi hita
asal ma porsea hita di Ibana. Asa marhite panghirimon na mangolu sisongon i ma
patoguhon rohanta laho mangeahi pangarupion ni Tuhan i.Maol do jolma mananda
haluaon na pinatupa ni Tuhan; mardalan do hita di portibion sipata marnangkok tua
songon pardalan ni bangso Israel na diuluhon ni si Musa i uju di parhorsihan.
Alai taida sikap ni bangso i, ndang sintong mananda haluaon na dipatongon Tuhan
di nasida. Aut sura ditanda nasida na Jahowa do paluahon, ndang tubu diroha
dohot pingkiran nasida pangalaho parungutunguton, mardosa nasida dompak Tuhan i
dohot lan na asing. Tauji ma mangarimangi, marningot huhut pajojorhon angka
pambahenan ni Debatab di ngolunta lumobi ma panobusion ni Jesus Kristus di
hita. Naeng ma gomal ma hata ni Debata dohot angka haluaon naung pinatupaNa di
tonga ni ngolunta. Marhite na marningot hita disi ma gabe lam tangkas
panandoanta ise do Debata/ Tuhan dipardalan ni ngolunta be. Nunga diparade
Debata angka na ringkot tu ngolu ni jolma sian mulan di masa ni panompaon i.
Nang pe salelenglelengna do Tuhan i, alani i sai ummarga ma Jesus di angka na
taharingkothon. Amen
