gr.abnerpanjaitan
I.Patujolo;
Sabindu do surat 2 Johanes on, mura antusan isina. Ay 1-3
marrumang patujolo na pasahathon tabe ni panurat; ayat 4-6 isi manang impola ni
surat 2 Johanes; ayat 7-10 marrumang panutup na pasahathon sibingkasi ni
panurat manurathon surat on. Marhite pandohan ”Ai” di ayat 7, dipatuduhon na
mangonjar panurat pasahathon surat on. Adong do 2(dua) parsoalaan na masa
tingki i, i ma na parjolo, na sai tongtong ro angka pangajari pargapgap na
naeng mangale halak Kristen asa mandoa sian Hata ni Debata . Poda na sintong i,
i ma na pabotohon na manulak nasida di pandohan na Kristus songon Debata jala
jolma (ptds tu ayat 7, ”ai nunga borhat torop siulahon sipaotooto tu portibi
on”). Na paduahon, tung i ma borat na na niadopan ni angka halak Kristen uju i
siala ni boi do ro sian bagas nasida sandiri i ma na lam moru parsitutuon ni
angka ianakhon manang ruas ni huria i mangihuthon hasisintong poda manang Patik
na sian Debata.
II. Hatorangan;
- Pangajarion hasisintong marhite
hata ni Debata.
dipatuduhon panurat on las ni rohana tu sada ina na manjalo surat on. Las
rohana ala dipodahon patik na jinalona (holong) ditongatonga ni keluargana.
Dihangoluhon keluarga ni ina ma patik i marhite poda dohot tiruan na denggan
sian inana. Jumpang di ianakhonna parange hasintongan hombar tu patik na
jinalona sian Ama i.Dipatuduhon ina i bukti ni holongNa tu Debata marhite na
manghaholongi keluargana. Marhite podana i diargahon basabasa ni Debata na
jinalona, i ma ianakhonna. Mangaradoti keluarga, ianakhon asa gab keluarga na
unduk tu Debata, i do tugas pemberitaan Injil. Molo masihaholongan
ianakhon(kelurga) i ma patuduhon na tahangoluhon Hata ni Debata. Parbaritaon na
denggan i ingkon di bonai do sian dirinta sandiri, keluarga, dung pe i asa tu
luar ni bagasnta. Ido na ni dok si Paulus di I Kort 9:27 “Hupukpuhi do dagingku jala hupatunduk, asa unang angka na asing
hujamitai, hape ahu gabe bolong”. Adong do keluarga dohot
sitangianghononta, ido tohonanta na parjolo laho mangajarhon marhite hata ni
Debata.
- Mangulahon hasintongan Hata ni
Debata
Molo nunga tangkas be dasor manang ojahan ni parpunguan I marhitehite
hasisintong hata ni Debata tarlumobi keluarga ni halak Kristen, ndang muramura
be dielaela pangajarion na ro manang sian dia pe. Halak na sai mian huhut
mangulahon hasintongan hata ni Debata ndang dipaila ngoluna, alai dipatimbo
Debata do, ido na didok 5 Musa 4.1 4:1
”Nuaeng pe, ale Israel, sai tangihon ma aturan dohot uhum, angka na hupodahon
tu hamu, sibahenonmuna, asa mangolu hamu jala masuk hamu tu tano siteanonmuna
i, na nilehon ni Jahowa, Debata ni ompumuna i tu hamu”. HataNa i do na
gabe ”kompas” dingolunta on songon na ni dok ni Apostel Jakobus “Haporseaon i pe songon i do: Anggo so adong
pangulaonna, naung mate do hadirionna” (Jak 2.17).
Asa unang mate
didok haporseaon I ingkon do sahat tu na mangulahonsa
III. Aha ma ondolan jala na
boi idaonta sian turpuk on:
1. Hombar tu topik
ni minggunta di Minggu XXIII dung Trinitatis ”Mangajarhon Hata ni Debata tu
Pinompar”, tontu diingil do hita sude ruas ni huria i asa mangharingkothon
ulaon on di ganup ngolunta dohot bagasnta be. Songon na didok ni Martin Luther,
mangajari angka ianakhon dos do songon na mangisi anggur tu sada drum na sian
hau i, sai na boi do suda anggur i alai molo angur ni anggur i sai na lohot do
di drum i. Molo nunga diboto dakdanak i hata ni Debata, di boto ma holong ni
roha, diboto ma mangulahon na denggan, ndada holan natorasna na boi menikmati i
alai godang halak manang di dia pe dakdanak i muse dungkon balga ibana.
2. Mangaradoti
dohot mangajarhon Patik ni Debata i ma tanggungjawab moral dohot tanggungjawab
haporseaon di ganup halak. Siala dijou jala dipillit Debata do ganup jolma i
asa mangulahon angka lomo ni roha ni Debata ima songon bangso marhite Patik na jinalo
na si Musa di dolok Sinai, asa dijou jala satia nasida laho mangulahonsa.
3. ”Holong” i do
hata na popular di panandaon ni halak molo ditaringoti hakristenon. Molo dibege
parugamo na asing hata “Kristen”, mamintor tarsunggul rohana tu hata “holong”. Pandohan”huhaholongi”
dikaithon tu pandohan mananda ”hasintongan”. Na mansiarainrainan do pandohan
on: ”Kewajiban do tu saluhut na mananda hasintongan laho manghaholongi”. Jala
halak parroha holong i do na mananda hasintonga. Amen
Tidak ada komentar:
Posting Komentar