gr.abnerpanjaitan
Lukas 16.10-13
1.
Taulahon na pasonang Tuhan i
Turpuk on, i ma
udut ni umpama ni Tuhan Jesus taringot tu ”juara bagas na geduk”, ayat 10-13 i
ma hahonaan ni umpama i. Marhite turpuk umpama i dipatuduhon etika kerja ni
juara bagas na geduk, ndang haposan ibana di ulaon na jinalona ala
dipansuasaehon na sahat tu ibana, ndang diramoti, ndang dipaganda, alani
tarhirim do nampuna ugasan i. Bisuk do juara bagas i manigor disarihon ibana
masa depan na. Dijou ma angka parutang laho mambuat rohana, diorui ma utangna,
ai tuanna i do na rugi disi alai ianggo ibana mangomo. Diturpuk on ndang hea
ditolopi Tuhan Jesus pambahenan ni juarabagas na geduk (korupsi). Alani na
nidok di ayat 10-12, molo so haposan hita di ulaon, ngolu dohot arta na tajalo
saonari Tuhan i, ndang lehononna tu hita arta na manontong i. Gari di na otik
ndang haposan lam di na balga ma? Adong
do halak na holan maranganagan sambing ndang diula hape naeng do disangkapi
gabe mamora, hape so mardongan pambahenan. Na uli do anggo sumangkapi angka na
denggan tu masa depan, alai ingkon mardongan pambahenan do i asa marhataridaan.
Unang ma alani na manghudus asa gabe halak na mora, na sangap jala na
berpengaruh. Lapatan ni i sude adong do ruhutruhut (norma-norma) siingoton jala
siulahonon. Molo sai gurbak mangulaulaonna na so margira tu dia, jala tung
marpaima do hapogoson gabe jambar ni sigurbak ulu (ptds Parjamita 10.18). Taulahon
ma na tau pasonang rohanta dohot pasonang Tuhan i.
2.
Manghamauliatehon silehonlehon ni Debata
”Angkup ni molo dilehon Debata tu manang ise jolma
hamoraon dohot sinamot, diloas huhut ibana mangan dohot mambuat jambarna sian i
huhut marlas ni roha di ulaonna, silehonlehon ni Debata do i.Ai ndang sadia
dipaingotingot rohana angka ari ni ngoluna, ala naung nialusan ni Debata ibana
marhite sian las ni rohana i”.(Parjamita 5.18) Diparhatopot Raja
Salomo do di sandok ngoluna, ai na adong di ibana saluhutna do i marharoroan
sian Debata. Hasangapon, arta ro di saluhut sinamot nang huaso (juarabagas) na
adong di ibana ro di sude habisuhon pe saluhut do i marharoroan jala
silehonlehon ni Debata do. Didok do diturpuk on diayat 16:11 Asa molo so haposan hamu mangaradoti Mammon
na geduk i, ise ma antong pasahathon tu hamu arta na tutu i? Sude
silehonlehon na sahat tu hita, unang tahaginjanghon alai bahen sangap goar ni
Tuhan i na taulahon silehonlehonNa. Dibahen
i nang hita pe tama do marhatopoton dohot manghamauliatehon saluhut asi ni roha
ni Debata na sahat tu hita.
3.
Ndang haoloan sada anak somang dua induk
Induk ima songon
pangarajai, ndang haoloan sada halak anak somang molo dua halak pangarajai. Tuk
ma holan sahalak pangarajai anak somang asa denggan pangoloionna. Ndang adong
pilihan di anak somang i ise oloanna manang ise tulakhonna. Mammon i ma huaso
ni portibion na sai mangarajai jolma, ala marhuaso do mammon mangarajai jolma.
Hape mammon i ima jadijadian ni jolma dipangke laho mangurupi jolma i mangolu. Anggo angka na porsea tung marhaposan do ibana tu Debata. Debata do
mangarajai jolma Didok di Psalm 63:8 “Ai
Ho do manjadi pangurupion di ahu, jala tarbahen ahu marolopolop di linggom ni
angka habongmu”. Debata do mangalehon mammon i tu jolma, alai boi do gabe
rumingkot ni turpuk on, so tung gabe mammon i mangarajai manang dihobasi jolma i.
Ndang haoloan ni jolma Debata rap dohot mammon. Hasatiaan tu Debata
manjalo upa sahat tu ujungna, alai satia tu portibion manjalo upa di portibi
on.
4.
Usul tu thema
·
Marhaposan tu Debata ma hita, unang marpangunsadean tu
pingkiranmu sandiri, sai haposi Debatam
·
Bulus ma mulaulaon, asa na niomona be dihangoluhon(1 Tes
3.12)
·
Bolongkon hagiot ni portibion, solukhon parange na
denggan (Kol 3.1-5)
Tidak ada komentar:
Posting Komentar